Pueblos mongols

Os pueblos mongols son un conchunto de pueblos orichinarios d'as estepas euroasiaticas orientals y que actualment se distribuyen principalment por o territorio d'os estaus de Mongolia, China (bi ha mongols en Mongolia Interior, Manchuria, Xinjiang y Gansu y Qingai) y Rusia (bi ha mongols en Buriatia, en atras zonas de Siberia y en Calmuquia). As luengas mongols las han clasificadas tradicionalment dentro d'a familia altaica, pero actualment se ye replanteyando esta clasificación. Historicament os mongols tenioron una gran expansión en a Edat Meya con a formación de l'Imperio Mongol. En periodos posteriors os mongols conoixioron unas expansions menors en forma de migracions tan luent como o Tíbet u lo curso baixo d'a Volga en relación con conflictos entre tribus u la formación d'estaus con clase dirichent mongola como lo Khanato Dzhungaro. Os principals pueblos mongols son os khalkhas, os buriatos, os oiratos (y como una branca esgallada d'éls os calmucos, o solo pueblo mongol habitant d'Europa Oriental). A mayor part d'os mongols son budistas lamaístas, con repuis d'una relichión anterior de tipo tengrianista.